ආගමික හා වාර්ගික අන්තවාදය උතුරේ මෙන්ම දකුණේ ජනතාවද පරාජයට පත් කළා

0

පාර්ලිමේන්තුවට පත්වන නියෝජිතයින් වෙත ජනතා පරමාධිපත්‍යයෙන් පැවරෙන වගකීම් ඉටු කිරීම සඳහා කිසිසේත්ම අදාළ හා අවශ්‍යතාවක් නොමැති ආගමික හා වාර්ගික අන්තවාදය උතුරේ මෙන්ම දකුණේ ජනතාව විසින් පරාජයට පත් කොට තිබීම සුවිශේෂී ලක්ෂණයක් බව නිවේදනයක් නිකුත් කරමින් සමස්ත ලංකා ජම්ඉයියතුල් උලමා සංගමය කියා සිටි.

2015 මහ මැතිවරණය හා ජනතා පරමාධිපත්‍යය

නිදහස් ශ්‍රී ලංකාවේ 15 වන මහ මැතිවරණය අගෝස්තු මස 17 වැනි දින පවත්වන ලදී. ව්‍යවස්ථාදායකයට (පාර්ලිමේන්තුවට) නියෝජිතයින් පත්කර ගැනීම යනු නිශ්චිත කාලයකට ව්‍යවස්ථාදායකයෙන් අපේක්ෂිත කාර්යයන් ඉටුකර ගැනීම සඳහා ජනතා පරමාධිපත්‍ය එම නියෝජිතයින් වෙත පැවරීමේ භාරදුර කාර්ය සිදු කිරීමකි.

මෙම මැතිවරණය උපරිම අයුරින් සාමකාමී ව හා නීතිගරුක අයුරින් පැවැත්වීම සඳහා මැතිවරණ කොමසාරිස්වරයාගෙන් හා පොලිස්පතිවරයාගෙන් ලද සාධනීය දායකත්වය කෙරෙහි අප සැමගේ කෘතවේදී පැසසුම හා ස්තුතිය අනිවාර්යයෙන්ම මෙම ශ්‍රේෂ්ඨ රාජ්‍ය නිලධාරීන් හා ඔවුන්ගේ කාර්ය මණ්ඩල සාමාජකයින් වෙත දන්වා සිටීමට අපි බැඳී සිටින්නෙමු. මෙයට පෙර කිසිදු මැතිවරණයකදී නොදුටු අයුරින් අපක්ෂපාතී, සාමකාමී හා නීතිගරුක මැතිවරණයක් සඳහා ඔවුන් කැපවීමෙන් හා දැඩි වෙහෙසක් ගෙන කටයුතු කළ බව අපි දනිමු. ඔවුන් සැම වෙත අප සංගමයේත් මුළු මහත් ශ්‍රී ලාංකේය ප්‍රජාවගේත් ප්‍රශංසාත්මක ස්තූතිය පළමු කොට දන්වා සිටින්නෙමු.

පාර්ලිමේන්තුවට පත්වන නියෝජිතයින් වෙත ජනතා පරමාධිපත්‍යයෙන් පැවරෙන වගකීම් ඉටු කිරීම සඳහා කිසිසේත්ම අදාළ හා අවශ්‍යතාවක් නොමැති ආගමික හා වාර්ගික අන්තවාදය උතුරේ මෙන්ම දකුණේ ජනතාව විසින් පරාජයට පත් කොට තිබීම සුවිශේෂී ලක්ෂණයකි. මෙම මැතිවරණයේ දී ශ්‍රී ලාංකේය ජනයා ඉමහත් පරිණතභාවයක් ප්‍රදර්ශනය කරමින් තීරණාත්මක අයුරින් මෙවන් පටු සියලු අන්තවාදයන් පරාජයට පත් කොට තිබීම ශ්‍රී ලාංකේය සැමගේ සතුටට හේතුවක් වනු නොඅනුමානය.

තම නියෝජිතයින් වෙත පවරා දෙනු ලබන ජනතා පරමාධිපත්‍ය නිසි කළමනාකරණ කිරීමක් සඳහා  ජනතා මැදිහත්වීමක් අවශ්‍ය බව අපගේ මතයයි. අප විසින් අපගේ නියෝජිතයින් වෙත පවරා දෙනු ලැබූ පරමාධිපත්‍ය පිළිබඳ විගණනයක් සඳහා මී ළඟ මැතිවරණය තෙක් නොඉඳ පුරවැසි එකමුතුවක් මගින් කරන්නා වූ ක්‍රියාකාරී මැදිහත් වීමක අවශ්‍යතාව අපි දකින්නෙමු. මේ සඳහා අපගේ ආගමික හා වාර්ගික අනන්‍යතාවන් දෙවැනි තැනට තබා ශ්‍රී ලාංකේය පොදු අනන්‍යතාව පෙරටු කොට ගෙන සැවොම එකට අත්වැල් බැඳගත යුතු වෙයි.

සමස්ත ලංකා ඉස්ලාමීය විද්වතුන්ගේ සංගමයේ හා සමස්ත ශ්‍රී ලාංකේය මුස්ලිම් ප්‍රජාවගේ පරම පිරිසිදු අපේක්ෂාව වන්නේ ශ්‍රී ලාංකේය සැමට සතුටින් සාමයෙන් ජීවත් විය හැකි සමාජයක් ස්ථාපිත කිරීම පිණිස අප සැම එක් මවකගේ දරුවන් මෙන් එක්සත්ව එක්සිත්ව සහෝදරත්වයෙන් කටයුතු කළ යුතු බවය. නිෂේධනීය ලක්ෂණ ඉවත ලා සාධනීය ලක්ෂණ රකිමින් හා පෝෂණය කරමින් ඉදිරි ගමනක් අරඹමු. විසංවාදී නොවී සංවාදී සමාජයක් තුළ සියලු කරුණු සාමකාමී ව විසඳා ගැනීමට අධිෂ්ඨානශීලීව ක්‍රියා කරන්නට ලක් මවගේ සියලු දරුවන් එකට අත්වැල් බැඳ ගනිමු. සෞභාග්‍යයෙන් සපිරි සංවර්ධිත ශ්‍රී ලංකාවක් ගොඩ නගන්නට අපගේ පුර්ණ දායකත්වය ලබා දෙමු.

ස්තූතියි,

අෂ් ෂෙයිහ් එම්. එම්. අහ්මද් මුබාරක්

ප්‍රධාන ලේකම්

සමස්ත ලංකා ජම්ඉයියතුල් උලමා සංගමය