දේශයම සුවපත් වන දහසකුත් අනාගත අපේක්ෂා දැල්වෙන සුභ නව වසරක් වේවා!

0

අතීතයට එක්වෙමින් ගතව යන සෑම මොහොතක්ම අපව දැනුමෙන් හා අත්දැකීමෙන් පරිපූර්ණත්වයට ළඟා කරන අතර උදාවන සෑම මොහොතක්ම අපගේ අභියෝගාත්මක හැකියාවන් විනිශ්චයන්ට බඳුන් කරන බව ජනාධිපති මෛත්‍රීපාල සිරිසේන නව වසරව් එනුවෙන් සුභ පැතුම් පණිවිඩයක් නිකුත් කරමින් සඳහන් කරනවා.

ජනාධිපතිවරයාගේ සුභපැතුම් පණිවිඩය,

“අතීතයට එක්වෙමින් ගතව යන සෑම මොහොතක්ම අපව දැනුමෙන් හා අත්දැකීමෙන් පරිපූර්ණත්වයට ළඟා කරන අතර උදාවන සෑම මොහොතක්ම අපගේ අභියෝගාත්මක හැකියාවන් විනිශ්චයන්ට බඳුන් කරන්නේය.

ගෙවීයන වසරට අප සමුදිය යුත්තේද, එළැඹෙන වසර අපේක්ෂා සහගතව පිළිගත යුත්තේද එකී දැක්ම පෙරදැරි කරගෙනය.

ඒ අනුව ගතවූ වසර සැලකිය හැක්කේ රටක් ලෙස අපට සාධනීය අපේක්ෂාවන් අපමණක් සාක්ෂාත් කරගත හැකි වූ වසරක් ලෙසටය. එමෙන් ම අප 2018 වසරට පිවිසෙන්නේ ද නිසැකවම ජයගත යුතුව ඇති අභියෝග රැසක් ද සමගය. රටක් ලෙස අත්පත් කරගත යුතුව ඇති සමාජ සංහිඳියාව, පරිපූර්ණ කළ යුතු මානව නිදහස මෙන් ම ධරණීය අවකාශයේ තවදුරටත් ප්‍රවර්ධනය කරගත යුතුව ඇති ශ්‍රී ලංකාවේ දිදුලන ප්‍රතිරූපය ඒ අතර ප්‍රමුඛ වේ. නව වසර උත්කර්ෂවත් එළැඹුමක් බවට පත්කළ හැකිවනු ඇත්තේ ඒ සඳහා වන අපගේ අධිෂ්ඨානය හා කැපවීම මතය.

එසේම නව වසර එළැඹෙන්නේ, දේශයේ සංවර්ධන ක්‍රියාවලියේ සමෘද්ධිමත් සමාරම්භයක් සලකුණු කරන, ශ්‍රී ලාංකීය වාරි විස්මිතයේ මහා ප්‍රාතිහාර්යය ජනගත කෙරෙන අසිරිමත් කඩඉම අභිමුවේදීය.

මොරගහකන්ද ජලාශයේ නීල දියවරින් කෙත්බිම් ඉසුරුමත් වන, දේශයම සුවපත් වන දහසකුත් අනාගත අපේක්ෂා දැල්වෙන අරුමැසි හෝරාවක සමස්ත ශ්‍රී ලංකාවාසී ඔබට සෞභාග්‍යයෙන් සපිරි නිදුක් නිරෝගී නව වසරකට සුභපතමි.”

මේ අතර නව වසර වෙනුවෙන් සුභපැතුම් පණිවිඩයක් නිකුත් කරමින් අග්‍රාමාත්‍ය රනිල් වික්‍රමසිංහ පවසා සිටින්නේ ලැබූ නිදහස අර්ථවත් කරගැනීමේ කාර්යය සිහිගන්වමින් නව වසරක (2018) ආරම්භය සිදුවන බවයි.

“යහපාලන රජය පිහිටුවන මොහොත වන විට රට තුළ විශාල සමාජ, ආර්ථික, දේශපාලන පිරිහීමක් පැවති අතර, දැඩි දුෂ්කරතා මැද වුව තිරසර සංවර්ධන ක්‍රියාවලියක් ඔස්සේ ආර්ථික ස්ථාවරභාවයක් කරා යාමට අපි කටයුතු කළෙමු.
ගෙවුණු කාලසීමාව තුළ ජනතාව වෙත සමාජ, දේශපාලන, මානව නිදහස අයත් කරදීම සඳහාත්, ජාත්‍යන්තර වශයෙන් අප රට පිළිබඳව පැවති අඳුරු ආකල්ප වෙනස් කොට සුහදශීලී වාතාවරණයක් ගොඩනැගීම සඳහාත් ප්‍රමුඛ අවධානයක් යොමුකරමින් කටයුතු කළෙමු. එම කටයුතු සාර්ථක කරගන්නට මේ වන විට අපට හැකි වී ඇත.
ප්‍රජාතන්ත්‍රවාදී, සදාචාරසම්පන්න දියුණු රටක් ලෙස ඉදිරියට යාම සඳහා අප රජය මෙතෙක් ගෙන ගිය වැඩපිළිවළට සහය ලබා දුන් සැමට කෘතවේදී වෙමින්, වඩාත් ශක්තිමත්ව ඉදිරියට යාමට මේ වසර තුළද ඔබ අප සමඟ රැඳී සිටිනු ඇතැයි අපේක්ෂා කරමු.” අගමැතිවරයා සඳහන් කර සිටිනවා.

LEAVE A REPLY

Please enter your comment!
Please enter your name here