සියළු බලවේග ඒකරාශි කරගැනීම අපගේ අරමුණ

8

එක්සත් ජාතික පෙරමුණ ප්‍රමුඛ සියළු බලවේග ඒකරාශි කරමින් ඉදිරියේදී පිහිටුවන ප්‍රජාතන්ත්‍රවාදී ජාතික පෙරමුණ මගින් ප්‍රජාතන්ත්‍රවාදය, අධිකරණයේ ස්වාධීනත්වය ආරක්ෂා කරමින් නිදහස් සමාජයක් ඇතිකරන බව අග්‍රාමාත්‍ය රනිල් වික්‍රමසිංහ මහතා අද (11) දින අරලියගහ මන්දිරයේදී පැවසීය.

එක්සත් ජාතික පක්ෂයේ ආසන සංවිධායකවරුන් සියලූ දෙනා සිය වගකීම් නිසි ලෙස ඉටු කරනු ඇති බව පැවසූ අග්‍රාමාත්‍ය රනිල් වික්‍රමසිංහ මහතා එලෙස ඒ වගකීම් ඉටු නොකරන සංවිධායකවරු සිටී නම් ඔවුන් සම්බන්ධව ගතයුතු පියවර කුමක් දැයි තම පක්ෂය තීරණය කර තිබෙන බව වැඩිදුරටත් පැවසීය.

අග්‍රාමාත්‍ය රනිල් වික්‍රමසිංහ මහතා මෙම අදහස් පළ කළේ අද (11) දින අරලියගහ මන්දිරයේදී එජාප නව සංවිධායකවරු 06 දෙනෙකුට පත්වීම් ලිපි ප්‍රදානය කරමිනි.

ඒ අනුව ප්‍රවීන ගායන ශිල්පී රූකාන්ත ගුණතිලක මහතා දඹදෙනිය නව ආසන සංවිධායක ලෙසත්, පාර්ලිමේන්තු මන්ත්‍රි කාවින්ද ජයවර්ධන මහතා මීගමුව සංවිධායක ලෙසත් ලලිත් දිසානායක මහතා අරනායක නව සංවිධායකවරයා ලෙසත්, තිලිණ බණ්ඩාර තෙන්නකෝන් මහතා පාතදුම්බර ආසන සංවිධායක ලෙසත්, මංජුල බණ්ඩාර මහතා වාරියපොල ආසන සංවිධායක ලෙසත්, ඩී. එම්. යූ. බී. විජේනායක මහතා හිරියාල ආසන සංවිධායක ලෙසත් පත්කරන ලදී.

එහිදී තව දුරටත් අදහස් දැක්වූ අග්‍රාමාත්‍ය රනිල් වික්‍රමසිංහ මහතා මෙසේ ද කීය.

“පුරප්පාඩු” වී පවතින එක්සත් ජාතික පක්ෂයේ සියළුම ආසන සඳහා නව ආසන සංවිධායකවරු පත්කිරීමට අපේ පක්ෂය තීරණය කර තිබෙනවා. ඒ අනුව එහි එක් පියවරක් ලෙස අද මේ ස්ථානයේදී නව ආසන සංවිධායකවරු 6 දෙනෙකුට පත්වීම් ලිපි ප්‍රදානය කරනවා.

අද පක්ෂයේ ආසන සංවිධායක ධූර භාරගන්නා මේ සංවිධායතුමන්ලා නව වැඩපිළිවෙලක් ඔස්සේ ඉදිරියට යා යුතුයි. මේ අයට මාගේ ස්තුතිය පළ කර සිටිනවා.

එක්සත් ජාතික පක්ෂය ප්‍රමුඛ එක්සත් ජාතික පෙරමුණ එකතු වී ප්‍රජාතන්ත්‍රවාදී ජාතික පෙරමුණ ආරම්භ කිරීමට සැලසුම් කර තිබෙනවා. මේ පෙරමුණට සියළු බලවේග ඒකරාශි කරගැනීම අපේ අරමුණයි. ඒ සටනට සූදානම් වීම අප මේ වන විට සිදු කෙරෙමින් පවතිනවා.

අද ආසන සංවිධායකවරු ලෙස පත්වූ ඔබ සියළු දෙනා සහ අනෙකුත් අපේ සංවිධායකවරු තමන් වෙත පැවරෙන වගකීම නිසිලෙස ඉටුකළ යුතුයි. එලෙස යම් සංවිධායකවරයෙක් කටයුතු නොකරන්නේ නම් ඒ අය පිළිබඳව ද පක්ෂය ගතයුතු පියවර තීරණය කර තිබෙනවා.”

නව සංවිධායකවරු පත්වීම් ලබාගත් මේ අවස්ථාවට සේදවත්ත පුරාණ විහාරාධිපති අඹන්වල ඥාණාලෝක නාහිමිපාණන් ප්‍රමුඛ මහා සංඝරත්නය හා ආගමික නායක තුමන්ලාද, සංවර්ධන උපාය මාර්ග සහ ජාත්‍යන්තර වෙළඳ අමාත්‍ය මලික් සමරවික්‍රම, අධ්‍යාපන අමාත්‍ය හා එක්සත් ජාතික පක්ෂ මහලේකම් අකිල විරාජ් කාරියවසම්, වරාය, නාවික කටයුතු සහ දක්ෂිණ සංවර්ධන අමාත්‍ය සහ අග්‍රාමාත්‍ය කාර්ය මණ්ඩල ප්‍රධානි සාගල රත්නායක යන මහත්වරුන්ද එක් වී සිටියහ.

 

8 COMMENTS

LEAVE A REPLY

Please enter your comment!
Please enter your name here